小白觀點：冇劇睇攞老人家條命

消委會公布以不良手法推銷高清機頂盒嘅黑名單，佢哋通常係搵公公婆婆落手，話唔用機頂盒，嘿嘿嘿，連電視都冇得睇呀！老人家唔驚就有鬼咯，孫仔去索K唔返屋企、孫女畀人搞大個肚都冇咁緊要，以後冇宮乜計呀、唔打自己友呀之類嘅劇集睇，簡直要咗佢哋老命，於是大拿拿幾千蚊都照畀。

咁嘅手法真係唔要得，人哋一格價就知買貴嘢啦！查實佢哋可以醒少少，直情話有辦法「種電視生機」同「茅山轉台法」，搵多幾個證人做媒，話經師傅搞過後，畫面會特別清，紅色特別紅，黃色零舍有層次，睇唔到咩，九成係唔夠誠心或唸錯咒，咁樣消委會都吹佢唔脹啦。

網友觀點...X）...

[　振華　]

咁樣呃啲阿公阿婆，真係冇陰功咯。

[　Cecilia　]

一聽到冇電視睇就真係生不如死啦，仲唔現兜兜幾千蚊都照畀咩。

[　吹水聰　]

機頂盒遲啲一定周街有得送啦，千祈唔好上當呀。

[　Melinda　]

宣傳高清技術都唔清晰，後生都未必明啦，何況公公婆婆吖，都唔知咩嚟，梗係畀人呃啦。

網址：www.sunsiupak.blogspot.com

阿豪觀點：裝高清要有心理準備

香港地做消費者有時都幾慘。幫襯電訊商，會畀蠱惑短訊騷擾；機頂盒又出現呃人嘅推銷手法。消委會公開咗幾間公司嘅名，有啲冒充房署職員，有啲甚至呃公公婆婆話如果唔裝機頂盒就冇電視睇，真係冇陰功呀！

消委會都有教大家點樣分辨正規同唔正規嘅機頂盒銷售商啦，相信都唔使豪伯喺度多嘴。但係我希望大家亦都要仔細諗清楚，到底需唔需要接收高清廣播，除非閣下想睇清楚啲一眾明星姐仔塊面原來有幾咁「滑溜」，直頭可以拍攝護膚品廣告（護膚前），又或者想令到廠景搭建嘅豪宅，其木板嘅紋理更纖毫畢現。各位考慮周詳先至決定買唔買機頂盒，畀人呃嘅機會肯定大大減少。

網友觀點...X）...

[　步gen雲　]

呢啲奸商，專呃無知嘅公公婆婆，正人渣！

[　momgetwell　]

消委會又話追查到有幾間公司專門呃人嘅，快啲將資料交畀警方，盡快拉晒呢啲奸商！

[　samsue0505　]

大廈嘅保安員都應該睇緊啲，唔好咁易畀陌生人上樓，至少都要登記身份證，日後追查都方便啲。

[　我愛帽子　]

唉，依家呃人嘅手法層出不窮，啲奸商將啲呃人伎倆改頭換面，連後生一輩都上當啦，何況係公公婆婆呢！

網址：www.lukchiho.blogspot.com

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另作通知，敬請留意。

明日主題

迷幻的士