嗱，立法會調查梁展文事件專責委員會成員湯家驊，被踢爆曾經向新世界集團提供法律服務，但並無申報利益，畀新世界投訴有利益衝突之嫌。立法會轄下兩個委員會閉門會議，極速裁定有關投訴唔成立，唔會進行調查喎。唔怪得新世界中國主席鄭家純質疑，既然立法會咁重視利益衝突嘅問題，佢有晒證據指湯家驊同新世界有生意來往，但立法會用閉門方式調查，冇耐就話無事，亦唔向公眾交代原因，係雙重標準「好兒戲」。

鄭家純指一小撮泛民議員「用特權法做藉口，為所欲為」，形同「立法會治港」。佢仲形容自己係螳臂當車，呢件事好影響佢喺香港投資嘅興趣，依家情願去大陸投資好過。

鄭家純扯火唔係冇道理o架，連立法會議員都承認，立法會係自己友查自己友。其實，自己友查自己友仲係其次，最離譜嘅係，佢哋仲要閂埋門傾，根本就係黑箱作業，會唔會秉公處理，大家心照啦。咁耐以嚟，泛民政客除咗為反對而反對、損人利己甚至損人不利己之外，仲為香港做過乜好事吖？

莫講話為啲九唔搭八嘅政治議題嗌到口臭，浪費時間同社會資源吖，就算純粹關乎經濟同民生嘅基建工程，都畀佢哋政治化咗，攞嚟為自己撈取政治本錢。

嗱，早排立法會審議廣深港高速鐵路工程撥款申請，部分泛民議員為咗幫自己造勢，居然使那渣招，採取「拉布」戰術阻撓討論，結果呢個一拖十幾年、原定今年底動工嘅計劃又要拖到明年初再拗過。

叮！呢班無良政客為咗達到自己嘅政治目的，不惜損害香港整體利益，更加唔會關心成千上萬建造業工人有冇工開。香港回歸十二年，亂足十二年，衰足十二年，除咗因為政府無能，政客搞搞震亦難辭其咎。

查實，唔止鄭家純扯火，好多本港商家對呢班政客都極之不滿，合和主席胡應湘就話過，香港近年發展落後於新加坡，主因係法治根基開始動搖。冇錯嘞，家陣政客惡晒，無法無天，人哋對香港前途仲邊有信心吖。

恒隆地產主席陳啟宗講得更白，話港府施政效率近年落後於上海，係本港「小政治」環境所造成，立法會議員經常阻礙施政，令政府「輕微癱瘓」，如果冇呢啲「小政治」，香港唔會咁快被內地拋離。

嗱，睇吓澳門，一心一意搞經濟，泛政治化根本冇市場，回歸十年旺足十年，中央領導人讚譽有加。反觀香港，政府跛腳，政客猖狂，商家焗住北上搵食。香港繼續沉淪，遲早變番條小漁村都唔出奇o架。叮！