政黨不時發表各種調查，最近建仔同關注性工作者權益嘅組織「紫藤」就有啲拗撬，事關建仔嘅立法會議員李慧琼（Starry）同黨友陳仲翔喺啱啱過去嘅周日公布咗一項少女援交狀況調查，聲稱調查係與性工作者組織紫藤「合作」，但紫藤前晚發聲明譴責民建聯挪用及扭曲咗佢哋嘅資料，澄清雙方並無合作關係。
Starry尋日朝在電台節目承認雙方工作上接觸不代表合作，並向紫藤道歉，但下晝再開記者會交代時卻迴避道歉問題，辯稱只係雙方溝通有誤會。據聞紫藤最擔心嘅，係事件令人誤解佢哋隨便洩露求助人資料，唔再搵佢哋幫手。對於未獲同意就公開披露資料，Starry堅稱只係雙方對「合作」一詞有唔同理解，基於雙方過去半年嘅「合作」，睇唔到紫藤提供嘅數據唔可以被引用，陳仲翔仲話喺記者會上引用數據，係「Common Sense」（常識）喎。Starry仲話，絕唔能接受紫藤嘅嚴厲聲明，相信佢係針對「增加政治本錢，行為可恥」，甚至認為有關行為「欺騙公眾、向公眾作出不誠實公告嘅行為感到遺憾」等措詞啩。