聖誕報佳音都可以玩出政治色彩，立法會議員陳淑莊（Tanya）尋晚同幾位青年公民嘅成員一齊喺銅鑼灣街頭報佳音，不過佢哋報嘅佳音句句都針住港府同煲呔曾近排嘅失誤，聽落真係令人會心微笑。其中有一段改篇自《崖上的波兒》，大鬧煲呔曾話「當奴似碌葛」、「做特首好似一場爛尾騷」。早前慳電膽等事件，佳音歌詞又話要將煲呔曾「摑一巴」。
咁抵死嘅歌詞連小學生都被吸引，企喺度聽足全首。唔好睇Tanya把聲平時咁磁性，尋晚聽佢唱歌先發現佢歌喉都唔錯。
Tanya話以前得閒都會同朋友去唱卡拉OK，主要都係唱梅艷芳嘅歌，佢話梅姐演唱會嘅歌全部都識唱，仲有人話佢把聲好似梅姐喎。睇嚟下次Tanya喺立法會做質詢，可以試吓搞搞新意思，唱條問題出嚟，睇吓各高官點拆彈！