港區全國人大代表陳智思係畫得之人，估唔到佢媽咪、亞洲金融集團董事長陳有慶夫人陳沈時芬都唔嘢小，陳太透露正準備同囝囝陳智思（Bernard）同大仔智文個女，一齊舉辦「三代同堂」慈善畫展，慶祝佢同老公陳有慶結婚六十周年紀念。
陳太話，佢同老公喺一九五二年結婚，雖然仲有三年時間先至滿一甲子，但佢已經諗定用咁特別嘅方式嚟慶祝。陳太精於國畫、油畫、水彩同瓷畫，讀藝術出身嘅Bernard最叻係點畫，至於現年二十幾歲嘅孫女，最拿手油畫。我哋讚陳太嘅遺傳基因好，陳太聞言好開心，愈講愈興起，話Bernard今年九歲嘅囡囡都畫得好好，但係年紀細，畫作唔多，所以今次唔搵佢參展住。
記得陳有慶仲做緊中華總商會會長時，佢哋為慶祝中總成立一百周年，搞咗第一次聯展；三年前喺泰國搞過第二次。今次慈善畫展就會用拍賣形式籌款，陳太話畫作嘅拍賣底價至少十萬元，唔過十萬元佢唔賣o架！