最近泛民因為五區請辭搞到大分裂，早期已被分裂出嚟嘅立法會前議員劉千石尋日就有個意外驚喜，離開政壇一段時間嘅佢，尋日獲港府委任做授勳評審委員會委員，有份負責敲定來年嘅特區授勳名單，阿石重回政壇做公職，就有份參加來年嘅分餅仔遊戲，真係出人意表。
阿石嘅任命都好特別，首先佢係回歸以來，委員會首位「疑似」泛民主派委員，佢嘅加入，令人揣測會唔會增加泛民成員嘅授勳率，其次係阿石加入，同樣有勞工背景嘅行政會議成員鄭耀棠就換出，呢個安排，唔多唔少強化阿石獲官方青睞嘅色彩。同佢一樣做授勳委員嘅仲有啱啱hea完嘅金管局前總裁任志剛。
至於out嘅一族，則有疑似特首參選人梁振英（CY）同港鐵主席錢果豐。有人質疑CY被踢出授勳委員會，冇得再借授勳派糖嘅公職為自己落場跑鋪路，巧合嘅係，呢個委員會主席係唐唐，咁呢種說法又有問題喎！所以又有人分析，CY喺呢個委員會前後服務咗冇十年都有八年，違反晒政府嘅「六六規定」，依家退落嚟係正常安排。