高鐵香港段工程嘅六百七十億撥款案上周五被泛民拉布拖延後，政府基於等撥款嘅工作太多，要求財委會主席劉慧卿破天荒喺八號連開三節會議，即係由下午三點鐘開始，連踩六粒鐘傾到夜晚九點，政府要財委會跑馬拉松係唔想啲議員照辦煮碗，以民生撥款在後，希望令議員感到壓力，最好啲拉布議員當時拗到口水都乾晒、面油都出埋，冇氣再嘈，咁就乖乖審批撥款啦。
點知多名上周五有份拉布嘅議員都異口同聲話，政府嘅要求好過分，係行政霸道、破壞規矩，不利議員同官員嘅個人健康同家庭生活，堅持最多只可以開兩節合共四粒鐘嘅會議。但係政府提交財委會嘅撥款卻另有北大嶼山醫院工程、民政事務總署嘅多元化地區活動，以及立法會新大樓嘅IT設備撥款咁多，實傾唔晒啦。
最慘仲係八號嘅財會前，有個內務委員會，其中一個議程係推選甘乃威調查委員會嘅七名成員，啲議員分分鐘又要拗餐飽，財委會可唔可以準時開都成問題。卿姐話如果只得一兩名議員反對開財委會長會，佢都可能會照開，但如果有一定數目議員唔肯開，佢就唔可以獨斷獨行啦。