呢個聖誕好多市民忙住買禮物，送份慈善禮物更加又潮又有心啦，東華旗下社企「樂群麵包工房」今年就推出聖誕曲奇，東華主席李三元早前不但親身去麵包房為學員打氣，更落手學整曲奇做埋生招牌，結果今年佢哋嘅銷量較舊年急升八成，工房做到應接不暇，被迫暫停接單，李主席開心到拍爛手掌。
由殘疾人士親手製作嘅東華曲奇一向香脆惹味，加埋李主席親自推介，今年嘅大客賽馬會、建築署及皇仁書院更早喺聖誕前已經落咗柯打，最後定單爆燈，麵包房要喺本月十八日叫停。
不過，有心人都可以去工展會撲慈善曲奇，因為東華個攤位由今日起一連二日義賣「樂群」曲奇，買唔到貨者可以去工展會掃貨，大禮盒裝有三款味道，包括朱古力、腰果及薑味，每盒只賣五十五蚊，細盒就賣二十蚊，東華仲打算新春都推出賀年曲奇，為社企打響名堂添。