煲呔曾可能淨係記得佢○七年喺施政報告講過要發展郵輪碼頭，刻意忽略呢個計劃早在九十年代社會已有廣泛討論，淨係老董任內都幾次提上議程，仲因為選址北角、尖沙咀定係啟德拗足五、六年，議而不決時，巨型郵輪嚟到香港都要喺海中心停泊、或者駛去貨櫃碼頭，拖到○七年，政府公開招標又被人捏住條頸，捱到招標流產，卒之要納稅人畀錢起郵輪碼頭，呢個過程，煲呔曾起咗乜嘢關鍵作用呢？

難為佢尋日竟然好風騷咁話，郵輪碼頭工程啟動標誌住香港郵輪旅遊發展踏出重要一步，工程可以強化本港做郵輪中心嘅地位，又可以創造大量就業機會，佢仲懶醒咁話呢啲係佢○七年宣布十大基建嘅理念。

十大基建唱慢板被質詢

佢呢幾句爭功抽水嘅說話實在令人氣憤。係人都知揼錢推動基建可以增加就業啦，問題係點解政府唔早做？左拖右拖搞到被鄰近地區搶佔咗先機呢？

立法會工程界代表何鍾泰都對政府議而不決好不滿，佢已經喺議會入咗個質詢，出年一月六號返嚟，立法會就會辯論點解十大基建講咗咁耐，開得工嘅唔夠兩個，到時，煲呔曾梗係會搵替身去捱鬧，不過，由此亦可見煲呔曾政府倡議嘅十大基建又係講多過做，拖拖吓，佢遲啲又多個可以攞威嘅功績，唔通佢真係當香港人傻嘅？