小白觀點：公帑遊埠咁筍邊度搵
係人都知乜專員物專員全部都係油水位，興之所至隨時作個名堂周遊列國，出差可以報大數，又可以用公帑住貴酒店，真係冇得頂呀！呢！審計署前排咪狂數私隱專員吳斌，佢老哥好嘢呀，隨手推個蛋散手下出嚟頂就得，咁嘅筍工邊度搵呀。如果有空缺嘅話，希望煲呔曾諗諗，睇吓可唔可以委任小白老弟做私隱專員。
本人做咗專員後，小市民嘅個人資料當然繼續畀人揚晒出嚟，但可保證煲呔曾嘅個人私隱一定唔會外洩，本專員加開大量個人私隱竊聽主任，基於安全考慮，一定要請番晒我嘅親戚朋友，日日偷聽人哋嘅私隱，如果聽到有人講煲呔曾益自己友嘅私隱，即刻拉人封艇。
網友觀點......
OhMyGod
呢份工好嘢呀，聽個名就知係唔使點做有份糧嘅筍工啦。
Blue friend
香港人有私隱㗎咩，政府部門最鍾意洩漏資料，網上咩都搵到，私隱專員擺到明係浪得虛名啦。
Jimmy
個名好似好威咁，不過唔知做乜，總之係大吃大喝嘅梳乎工啦！
King09
哼，吳斌犀利咯，亂花公帑，使完拍拍屁股走，卸得就卸，人中之蟲呀！
網址：www.sunsiupak.blogspot.com
阿豪觀點：鄧爾邦吳斌有辦你睇
平機會主席鄧爾邦大花筒，但係就畀人鬧極都唔使走頭，當時大家都諗：究竟仲有冇咁嘅筍工？答案其實係肯定嘅！大家睇吓私隱專員吳斌，又係犯下多宗罪，點知佢通通卸畀其他人，都係又冇人吹得佢脹就知啦！
有人話，吳斌就係鄧爾邦推薦，接任佢個私隱專員個位嘅。照咁睇，吳斌呢個徒弟真係青出於藍喎。大家諗吓，鄧爾邦只係大聲夾惡，理曲氣壯，但吳斌就識得賴其他人連累佢。
好似成日話政制及內地事務局冇畀足夠資源佢，甚至話想見吓局長都難，結果林公公都要屈服，增加資源畀私隱專員公署請人，哈哈，愈畀人鬧大花筒就愈多錢使，畀佢吹脹！
網友觀點......
卜 勤
調佢哋去做審計署咪得囉，佢哋點都唔會話自己冇牙老虎啩。
momgetwell
佢哋兩個同樣面皮幾呎厚，在使錢方面又咁夾，不如結拜啦！
匿 名
被人鬧完仲走出嚟反駁，話自己冇使多，兩個都咁無恥！
蘇珊波兒
呢兩個廢人，當全港納稅人係佢哋嘅自動提款機，想使就使，根本唔諗吓有冇需要！
網址：www.lukchiho.blogspot.com
發表方法
讀者如對本欄每日話題有任何意見，歡迎登入網址發表意見。本報保留採用刊登權利，不另作通知，敬請留意。