雪糕仔朱先生寒冬蝕住擺檔，即使真係誤闖禁區，都唔使出動十名小販管理隊人員去「圍剿」吧！賣雪糕啫，何需好似捉大賊咁！目前失業率仍居高不下，勞工及福利局局長張建宗一味派定心丸，話就業情況開始好轉，其實全港失業大軍仍逾十八萬人，尤其青少年失業情況非常嚴重。

講真，即使有份工，都頂唔順一片加風，衣食住行樣樣加，政府無力遏制加風，更沒有意思扶貧，小市民只好嘆句生不逢時！不過，如果你係打政府工嘅，就一天光晒！好似民政處新官上任，在私人會所開聯歡會，杯上杯落，食足三粒鐘，你話幾咁寫意。至於局長級如周一鑊，懶理你豬流感疫苗注射後有冇副作用，打或不打，自己執生，佢已經逍遙度假去！

世界經濟可謂五勞七傷，在亞洲，日本國內出現極為嚴重的需求不足，商品價格一落千丈，在五百多種商品中，十月份有百分之六十二的價格較上月下跌。日本經濟界估計，今後三年，通縮仍將給經濟帶來巨大壓力。

搵食艱難，睇吓雪糕仔嘅遭遇，你就會感到「生之淒涼」，每日賺百多元，又無端端被檢控。食環署是否想逼到人走投無路，日日在被窩，佢哋先至唔會囉唆！