邊個話小牛冇魯域斯基一定唔掂o架？雖然小牛尋日欠缺呢名王牌射手，但卻憑頂替佢嘅添湯馬士同一班老將嘅出色表現，帶領小牛主場以102:95砌低騎士，令勒邦占士第500場常規賽留下痛苦嘅回憶。

占士第500場常規賽出醜

日前畀火箭後備蘭特利撞傷嘅魯域斯基，尋日賽前練習時，因為仍然舉唔起手肘，最後決定唔上陣，於是小牛派出添湯馬士今季首度擔正，結果呢名32歲老將交足功課，射入22分，加上傑特同馬利安等6名球員都至少有8分，齊齊帶領小牛輕取東岸勁旅騎士。賽後小牛控衞傑特風騷表示，就算冇魯域斯基，球隊都會照咁打：「對於魯域基斯缺陣，我哋真係唔係睇得咁重，我哋每人只係諗住點樣攞25分。我哋絕對有足夠嘅球員得分，當然我哋今晚防守亦好出色。」

的而且確，小牛尋日真係Mark到騎士主將勒邦占士一戙都冇，特別喺第4節更加令「大帝」只得2分進帳，結果令第500次喺常規賽上陣嘅占士全場只得25分兼輸波收場。講番魯域斯基，據講佢傷勢唔算太嚴重，預計可以喺聽日對拓荒者復出，對於勢如破竹嘅小牛嚟講簡直如虎添翼，主場小讓5.5分上盤值得再追。