咁又奇喇！煲呔曾打針嘅時候笑口噬噬，話一啲都唔痛，仲猛讚個姑娘手勢好添。市民做乜嘢仲咁擔心呢？咁又點同噃，高官嚟做騷，醫院實係樣樣依足程序啦，仲會搵最好嘅醫護人員幫佢哋打針，但普通市民邊度有咁着數呀。其實，打針技術仲係事小，最大問題係，直到依家，當局都冇講清楚，啲疫苗究竟有乜嘢副作用，打咗會有乜嘢事發生。

早排內地同台灣都發生咗打豬流感針後傷亡事件，前幾日，美國又回收咗幾十萬劑疫苗，嗰啲疫苗同香港嘅疫苗都由同一間藥廠生產，香港人聽咗都心驚肉跳。加上班高官冇事搵事嚟做，要求注射者簽同意書，大家都以為係生死狀，政府又解釋得唔清唔楚，愈聽愈矇查查，邊個仲敢打針呀？叮！

市民唔肯打針，當局就出絕招。佢哋話喎，豬流感患者服用特敏福等藥物效果唔理想，部分高危病人可能免疫系統有問題，食藥後未能及時控制病毒，就會瓜老襯，仲估計第二波豬流感殺到後，全港會死三百人。嘩！咪仲慘過沙士！

點算好呀？唔使驚，注射咗疫苗咪唔使死囉。講嚟講去，原來喺度促銷疫苗。唔好玩啦，人嚇人會嚇死人o架！

言歸正傳，尋日雖然打針嘅人好少，但係就由頭亂到尾，有家長帶BB去健康中心，等咗兩粒鐘先至打到針。有啲長者啱啱打過肺炎球菌同季節性流感針，按規定要隔兩三個禮拜先可以打豬流感針，但診所唔理咁多，照同佢哋打豬流感針。大佬，冇事就話啫，有乜嘢冬瓜豆腐點算！

仲有噃，尋日係安排政府門診先接受注射，私家醫生下個禮拜先開始，但係好多私家診所都偷步搶生意。按政府指引，首批疫苗先畀本港嘅高危人士注射，但係有診所就為外地人同埋普通病人注射。咁點解當局唔理嘅？嘥氣啦，疫苗到咗私家醫生嗰度，同邊個注射，當局點理得咁多呀？

唔怪之得有傳染病科醫生直斥政府卸責，注射疫苗計劃本來係一個公共衞生行動，政府搵私家醫生打針，又管唔到啲針，有乜法子唔係愈嚟愈亂呀！

叮佢個鎯鎯，照依家咁嘅進度，幾時先可以為全部有需要嘅人注射完呀？之但係，第二波疫情係唔會慢慢等嘅，話嚟就嚟，政府唔通真係等到好似沙士嗰時咁慘情，先肯認認真真做嘢咩？