小白觀點：學散打冇人敢埋身

有個中年人拎咗個雪糕仔牌，仲好上進咁上堂學做生意，考埋電單車牌，以為可以自力更生啦，點知食環署班香港「城管」唔理三七二十一，一於照掃可也！

唉，呢位雪糕哥哥又係嘅，當局保唔到就業都叫人去攞綜援啦，冇錯，雖然高官畀得心不甘情不願，仲會帶頭玩歧視添，但總好過攞正牌都畀人玩吖嘛。

話時話，深圳試過有少林武僧當街耍功夫，向來惡慣嘅城管call幾隊人嚟都冇人夠膽埋身，所以得個雪糕仔牌確實係冇用，不如去學幾個月散打，有人圍即刻show證證明閣下嘅功夫可以三秒KO「通尼渣」泰拳，相信惡城管見到都會搵路走，過隔籬揀個老弱婆仔恰吓好過。

網友觀點......

凱兒

雪糕車已經係香港瀕臨絕種動物喇，仲要趕絕，咁離譜。

Chico

依家小販牌幾難有呀，人哋都係搵啖食啫，咁都趕絕！

非典型

食環署啲人一係吞泡，一係就亂咁捉人當做show，有邊次啱㗎？

GeeGee99

喺「小販黑點」中咗招都唔知，一係食環署大大隻字寫到明囉，依家擺到明陰人啫！

網址：www.sunsiupak.blogspot.com

阿豪觀點：小販牌換條命有賺

政府今年再發電單車賣雪糕嘅牌照，結果好多人爭，但係爭到都未必係一件好事。有位仁兄有牌經營㗎，點知畀食環署販管隊啲人話佢「阻街」，最妙嘅係，明明警察都話唔阻街，販管隊班友就夾硬要用呢個罪名檢控嗰位仁兄。

政府咁樣發牌法，分明就係靠害，情況就好似發出駕駛執照畀人揸車，但係就永遠唔話你聽邊度係禁區，直至你有一日停車嘅時候，至有人失驚無神咁走出嚟罰你錢，咁你話服唔服嘞？

不過話分兩頭，有牌小販待遇始終比無牌小販好啲，起碼唔使畀販管隊追落明渠浸死，或者追出馬路畀車撞吖！照咁睇，一個小販牌換番條命返嚟，有賺啦！

網友觀點......

manning得意妹

呢啲雪糕車已經買少見少，係唔少人嘅集體回憶，好心政府就放佢哋一條生路啦……

嬋豬wellwell

搞錯呀，夾硬砌人阻街罪，食環署班友肯定為咗交數早啲收工啦！唔知可唔可以投訴佢哋呢？

晝伏夜出

又要發牌畀人，又要拉人阻街，咁就唔好發牌啦！同賣煙又唔畀人喺街食有咩分別先？

beatles fans

同意！曾蔭權成日話文化保育，得個講字，要你下面班G聽你支笛先得㗎！

網址：www.lukchiho.blogspot.com