雖則話政改方案係優化版，但仍了無新意，畀泛民炳到飛起，依家正值政改諮詢期，做首席推銷員嘅政制及內地事務局局長「林公公」林瑞麟自然成眾矢之的。
尋日喺一個籌款活動見到林公公嘅三哥Simon林兆麟，佢話唔覺林公公喺推政改方面有壓力，因為從來都冇聽佢提起過喎！Simon仲為號稱「人肉錄音機」嘅細佬辯護，話林公公私底下其實好幽默，喺家庭聚會度成日都會講笑話氹人開心，絕對唔係平時打官腔咁沉悶。
本身係會計師嘅Simon話，林公公係家族中最細嘅細佬，細細個成日畀班阿哥蝦，但六兄弟姊妹嘅感情其實好好，每逢大時大節幾個家庭都會聚埋一齊食飯。
不過佢初初聽到細佬又畀人叫做公公，又話佢日日噏廢話時，心裏面都有啲唔舒服，但事後知道細佬一啲都冇將呢啲小事擺喺心，慢慢就習慣咗，依家都已經唔介意嘞！