正所謂冬大過年，家有賢妻做「一家之煮」嘅立法會議員「象哥」黃定光同「肥仔明」李華明，當然唔使為呢餐做冬飯頭痕啦，但講到要食乜餸，佢哋都異口同聲落柯打話唔可以冇雞。自封係「肉皇大帝」嘅象哥自細鍾意食雞，仲淨係食脂肪低嘅雞胸，但佢就認為自己蠢到加零一，因為雞胸肉唔夠滑。
至於年頭大呻阿媽大拿拿攞三百蚊買隻鮮雞嘅肥仔明，唔知係咪肉痛到依家，所以今年做冬佢都寧願疊埋心水食冰鮮雞。佢仲話鍾意食豉油雞，所以平平哋三、四十蚊買隻冰鮮雞嚟做豉油雞都冇問題，總之鍾意豉油味，唔理啲雞夠唔夠雞味。
雖然象哥同肥仔明屬唔同政黨，政見仲南轅北轍，但呢次就好齊心喎！講緊乜嘢？咪就係一齊反雞皮囉！象哥話佢後生嗰陣都鍾意食雞皮，依家？咪制喇，因為冇Quota喎。梗係啦，雞皮咁勁脂肪！