本文重點
喺上禮拜五財委會審批高鐵撥款申請時，力推五區總辭嘅社民連同公文袋玩嘢，加深財委會主席、白鴿黨議員劉慧卿對佢哋嘅不滿。尋日卿姐同傳媒講開，話白鴿黨會喺表決政改方案前召開特別黨員大會，由黨員決定黨嘅投票立場，之後就猛呻傳媒硬係唔會問佢有關政改嘅新聞，事關佢力撐二○一二雙普選，除非二○一七同二○二○嘅普選時間表有鐵一般保證，否則二○一二冇雙普選就冇得傾！
重申支持2012雙普選
卿姐咁大力重申自己支持二○一二雙普選，其實話有玄機。心水清嘅人必定記得，五區總辭、變相公投嘅議題係「落實真普選，取消功能組別」，即係冇提及二○一二。卿姐亦坦言擔心畀人誤會劉慧卿唔再支持二○一二添！
回顧上禮拜五成千名反高鐵人士喺立法會外集會，財委會散會後唔少泛民議員都有現身，公社兩黨仲乘機宣傳五區總辭，唯獨唔見白鴿黨。卿姐解釋佢當日約好喺沙田會見市民，所以先冇去到，至於佢嘅黨友點解冇去就不得而知嘞！事到如今，聽卿姐嘅口脗，就知佢會唔會為總辭議員出力，睇嚟佢對社民連同公文袋嘅不和已經浮晒上面。