據聞最冇癮嘅唔係煲呔曾同一眾畀佢放飛機嘅賓客，而係其他冇獲邀出席嘅城中名人，質疑佢連慶祝結婚周年紀念都要玩親疏有別，唔當佢哋係「曾朋友」。所以飯局搞手「煲呔針」鄭經翰同其他賓客，事後都一致否認嗰餐飯係為煲呔曾夫婦而搞，聲稱只係一場大食會，為煲呔曾臨時甩底同請漏人遮醜。

喺嗰次飯局後，煲呔曾又捲入雷曼迷債益弟婦風波，民望再度插水跌至「不受歡迎」水平，但咁都冇打消到佢慶祝結婚周年嘅興致，事隔短短三個禮拜後鬼祟翻叮，補鑊慶祝，地點改喺唔會有外人撞破嘅禮賓府舉行。

據獲邀出席嘅賓客透露，煲呔曾當晚喺禮賓府筵開九席，比上次原定嘅七席多兩席，最終有逾百名嘉賓到場。其中坐主家席嘅清一色係煲呔曾夫婦嘅親人，但就唔知有冇請到佢代理慳電膽嘅親家同買咗雷曼迷債嘅弟婦嘞。

今次煲呔曾仲開宗明義叫大家唔好做禮，以免自己再爆多單利益輸送醜聞。其實佢喺當日朝早已公開收咗一份大禮，就係民調專家鍾庭耀撰寫嘅《香港家書》，當中揶揄煲呔曾咁不受市民歡迎，喺英美民主國家一早就倒咗台，難為佢仲有心情大吃大喝慶祝！