香港專業及資深行政人員協會搞嘅南極團，出發咗唔經唔覺已有兩個幾禮拜，一行十九人將會喺今日返到香港，會長容永祺一到咗阿根廷就第一時間將南極圖片傳送返嚟，睇嚟佢哋玩得好開心。
唔好以為一眾名人只係一心去極地睇企鵝，事關呢個係考察團，團友們除咗去了解有關南極洲嘅生態保護外，仲去咗拜訪中國南極長城考察站，參觀中國考察隊嘅科研工作。
容永祺引述同行嘅上海政協常委胡曉明同全國人大代表羅范椒芬話，呢個團大大咁提高咗佢哋嘅環保意識，仲話覺得大自然嘅力量好難抗拒，並且好欣賞所有動物嘅生存能力。
今次名人南極探險團既睇到南極嘅冰河同企鵝，又可以認識中國嘅極地科研，仲見埋中國駐阿根廷大使，可謂一次過滿足晒三個願望！