除咗球員升價十倍、個個做晒球星之外，仲突然有好多人撲出嚟獻計，話要點樣發展香港足運，連政府都好似暈晒大浪，一方面肯定咁話會撥多啲資源畀足運發展，兼且搞培訓中心，另方面仲好大口氣咁話好有信心申辦亞運會添！

喺民情咁高漲嘅時候，又點少得以民意代表自居嘅立法會議員份呀。有啲議員又乘機抽水，爭先入紙申請提動議辯論，促請政府推動本港體育運動發展。

力爭元旦後首個檔期

正所謂打鐵趁熱，攤凍咗仲邊有人理吖。為咗要食住東亞運條水，經濟動力嘅議員「蘇菲」梁劉柔芬同建仔嘅議員差唔多時間入紙，希望爭到元旦假期後首個立法會大會嘅檔期，即係下年一月六號。

點解蘇菲咁熱心？因為佢係足總主席夫人囉！足總主席梁孔德就係佢老公嘞。睇蘇菲初步嘅動議字眼都寫得好白，頭嗰句十足政府就東亞運嘅宣傳口號咁，話要延續東亞運傳奇，促進香港體育發展喎！香港足球代表隊奪金咪係東亞運傳奇囉，唔難理解蘇菲係想為老公出面造勢。

之不過，呢次動議檔期係要抽籤決定，點知建仔嘅議員竟然可以抽贏，搶先喺一月六號提出類似嘅動議，蘇菲個動議就要至少押後一個禮拜，因為要同其他幾個議員抽籤。

咁即係話，蘇菲就好似一心帶住個波想射入龍門，點知畀建仔嘅議員攔腰剷走咗個波，想射波都射唔到，功虧一簣。再講吖，就算蘇菲順利抽到其後嘅一個檔期，但班議員喺早一個禮拜已經噴晒口水花，唔通過一個禮拜又再講咩，就算議員有興趣講，市民都嫌班議員三幅被啦！

冇理由明知蝕晒章都繼續㗎，睇怕蘇菲都會考慮轉議題，呢次想幫老公造勢可謂有心無力。