「咇咇，閣下有一封好香艷嘅情書！」

近年來，大家時不時收到呢類追魂短訊，一旦誤墮收費陷阱，閣下個荷包隨時危過危地馬拉。消委會早前揭露，今年內已接獲五百幾宗相關投訴，「東方報業民意調查」顯示，七成三市民曾經收過收費短訊，其中一成一幾乎每日都收到，兩成四每星期都收到，認為本港濫發收費短訊情況「嚴重」同「非常嚴重」嘅市民分別有四成三同四成二，只有兩個巴仙認為「唔嚴重」。太一叮隱約見到，啲民怨好似大江決堤咁湧出嚟呀！

喺咁嘅情況下，商務及經濟發展局局長劉吳惠蘭日前先急急腳咁責成電訊管理局，然後匆匆忙咁召集五大電訊商開會，要求佢哋正視問題。難怪有三成八人認為電管局從來無正視問題，三成四批評當局對收費短訊監管不力，近兩成認為電管局愛理不理，一味將責任推畀電訊商。對於消委會踢爆亂象之後，當局先至正視問題，近一半人認為當局受到壓力才有行動，三成三認為政府後知後覺，總之就應咗廣東人嘅一句話──四方木，唔踢唔郁。

而更弊嘅係，雖然當局言之鑿鑿話會解決問題，原來都係鱷魚頭，老襯底咋。大家睇吓劉吳惠蘭，一邊話收費短訊問題「絕對不能接受、不能容忍」，但所謂嘅解決措施，原來只係同電訊商訂立無實際約束力嘅指引，而電管局就索性舉起白旗，聲稱收費短訊由資訊公司經營，但局方無權監管資訊公司。好笑嘅係，轉個頭，電管局副總監夏勇權又漏口，話發放短訊嘅電訊商同資訊公司一般會七三分帳。電管局對電訊商無監無管，好明顯係失職啦，叮！

其實，無論電訊商又好，資訊公司又好，只要當局有心規管，一定搵到辦法。就好似有五成四市民認為，政府應該修例監管不良資訊公司，四成半市民批評，當局以自律形式規管收費短訊過於被動，兩成四認為政府輕視問題嘅嚴重性，兩成二嘲笑當局「太天真」。計太一叮話齋，政府缺少嘅絕對唔係解決問題嘅辦法，而係一個保障市民利益嘅心。

濫發收費短訊，後果可大可小，有人喺一粒鐘內被百幾個短訊狂轟濫炸，幾乎精神崩潰，有人忽然收到萬幾蚊嘅電話帳單，搞到家嘈屋閉，甚至有小朋友不知不覺欠下巨債，畀阿媽剷上天花板後萌生自殺念頭。再咁落去，萬一真係釀成奪命慘劇，監管不力、後知後覺、麻木不仁嘅政府，就係幕後幫兇。

為免謀財短訊害命，太一叮建議大家齊齊拎起手機，以牙還牙，以訊還訊，合力煩死劉吳惠蘭：「咇咇，飭令政府加強規管，設法杜絕追魂短訊，否則，小心太一叮嘅追魂叮！」