本文重點
尋日舉行最後一場西九諮詢會，出席嘅西九管理局諮詢會主席張仁良罕有咁摘下眼鏡，令人耳目一新，初時以為佢想配合諮詢對象係青年人，刻意打扮得後生啲，點知原來係因為佢啱啱做完左眼嘅白內障手術，換咗人工晶體後連近視都冇埋。佢講笑咁話就算右眼做埋手術，都唔可以真正脫離四眼一族，仍要老花眼鏡傍身，一係就要拖實老婆先得喎。
林順潮操刀白內障手術
呢次白內障手術係由身兼全國人大代表嘅林順潮操刀，為免雙眼一齊受感染，所以分開兩次做手術。張仁良話手術時睇住手術刀拮埋眼好驚，尤其係佢嘅手術亦係教學示範，林醫生一邊做一邊同學生講解過程，令佢驚上加驚。
張仁良右眼有六百幾度近視，佢話暫時要戴住隱形眼鏡先，手術會係下個月七號進行，啱啱就係西九文化區第一階段諮詢嘅截止日期。