整法不中不西

鬍鬚曾話傳統嘅火雞整法會喺雞腔釀栗子、豆、麵包同芹菜等，而佢就一改傳統，將中式臘味糯米飯釀入火雞，話加埋臘腸、臘肉嘅油香，食落特別香口。不過，佢呢個火雞新整法將傳統蔬菜餡料改為含高飽和脂肪嘅臘腸、臘肉，好聽啲就係fusion菜，唔好聽就係不倫不類，尤其佢呢個心臟病人多食無益，佢仲要「推己及人」，因住好心做壞事喎。

做得財爺，自然要數口精，大家睇鬍鬚曾點整火雞，可能會知道佢為人係點，因為佢可以一雞幾味食足幾個禮拜，例如一家會先食火雞腿，然後將食剩嘅火雞胸切成薄片做三文治餡料，碎肉則撈薯蓉，炸成croquette（火雞餅），至於火雞帶肉嘅骨架就用嚟煲湯或粥，認真算死草。

不過，佢早前先畀立法會議員批評財政預算案諮詢小冊子忽略貧富懸殊日益嚴重嘅問題，如果佢制訂預算案時可以本住食火雞算到盡嘅精神，咁就真係香港之福喇。