過多幾日就係聖誕節，又係港人出外旅行嘅熱門日子，就連一眾高官都話要放假抖吓氣，其中保安局局長李少光遲啲都計劃放假，但只係返內地打高球，唔會去得好遠。泰國包機事件令佢變成驚弓之鳥，就算依家有副局長黎棟國幫手，有長假佢都唔敢遠行。
發生泰國包機事件嗰陣，李少光仲喺日本公幹緊，結果局中冇人可以擔大旗，救援行動慢人哋十拍，差啲令成個特區政府陷入嚴重管治危機。雖然今年十月黎棟國上任保安局副局長，就算李少光唔喺香港，一個唔該發生大事故，保安局都未至於冧檔，但睇嚟李少光都係寧願親力親為，只係敢放短短四日假，去遠啲都唔敢，方便有乜嘢事可以即刻飛返香港主持大局。
有乜新年願望？李少光同人講話最緊要係驗毒成功，睇嚟佢好緊張驗毒工作，可見驗毒計劃係只許成功不許失敗。