睇番佢哋之前嘅財政報告，幾乎年年冇錢剩。今年五月，佢哋位於灣仔嘅總部加租八千蚊，公文袋已經冇錢畀，最後要由甲級寫字樓搬去北角嘅工廠大廈。黨內人士透露，大大聲話要總辭嘅議員，到依家仲未傾過經費問題，又未有計劃搞籌款活動，黨內人人都唔明點解佢哋咁老定。

一來一回要五百萬元

如果按佢哋嘅計劃，陳淑莊同梁家傑分別喺港島同九龍東參加補選，競選經費上限，總數達三百幾萬元，再加埋佢兩個起碼有五個月冇議員津貼嘅收入，即係冇咗二百幾萬元！一來一回，公文袋要搵番五百萬元至夠補番條數，點計都係蝕。

公文袋內部就指嗰啲議員咁老定唔籌錢，其實得兩個可能，第一就係佢哋為求辭職造勢，不擇手段，唔理現實，諗都冇諗過經費嘅問題，就決定唔理成本點都要去選。

另一個可能，就係佢哋喺總辭之前已經搵定條大水喉照住，所以先心口貼住個勇字。但無論邊個可能性都好，總辭一成事，補選要用一億五千萬元公帑，廣大市民必輸！