六十年代係南華會主任

哥頓平日滿口生意經，好少將足球掛口邊，原來佢唔聲唔聲支持港足多年，早喺六十年代已擔任南華會主任，最大嗜好係踢波，仲專踢前鋒，佢自嘲射十二碼唔及陳肇麒醒，但球場以外佢為港足開路，兩年前禮聘克羅地亞教練來港擔任港隊總教練，力谷球員體能同技術，令成隊波脫胎換骨。今次吐氣揚眉，哥頓一於派錢振奮士氣，仲特製咗一個巨型足球大蛋糕慰勞球員。

慶功宴上，足總主席梁孔德、議員太太梁劉柔芬、東亞運足球代表隊領隊羅傑承同太太梁芷珊都係座上客。梁孔德為港足仆心仆命，開賽前曾因過度勞累感染肺炎入院，一度發高燒，不過當睇見球員捧盃，乜病都唔記得晒。佢仲計劃為港足成立基金，目標籌款數千萬元，誓要特訓呢班精英，再創傳奇。