老實講，提上財委會嘅撥款申請係由政府排序，唔係由財委會自行決定，若果下月初再開會嘅話，一開波理所當然梗係傾高鐵啦，冇理由將佢擺埋一邊，傾另一項新嘅撥款申請㗎！就因為咁先頭痕，事關跟住落去嗰啲撥款申請，都唔知幾時先可以傾。

點解咁講？事關排喺高鐵之後嘅撥款申請，包括北大嶼山醫院第一期工程，涉及超過二十四億元，而呢項工程係當區居民爭咗好耐；跟住係民政事務總署計劃加強多元化社區活動嘅撥款申請，涉及一億八千萬元，呢兩項撥款比起高鐵撥款更急，若果社民連同公文袋再阻住高鐵撥款，下次會都傾唔完嘅話，咁呢啲涉及民生嘅事務就開展唔到，咁佢哋咪係累人囉！

再講，排喺兩項民生撥款申請後邊嘅，就係有關立法會新大樓資訊科技工作嘅撥款申請，雖然涉及唔夠一億元，但若果搞垮埋，咁立法會秘書處就唔知幾時先可以做採購工作，正所謂牽一髮動全身，到時拖慢埋新大樓嘅建造工程，佢哋就等於累埋自己。

盟友卿姐倒瀉籮蟹

呢次拉布事件亦揭發泛民內部內訌加劇。話說當日泛民喺財委會前嘅飯盒會中，社民連同公文袋力陳對高鐵嘅關注，因為白鴿黨劉慧卿係財委會主席，為咗公平起見冇去開會，可能因為白鴿黨拒絕總辭，社民連同公文袋決定玩拉布，事前都唔通知白鴿黨一聲，搞到卿姐倒瀉籮蟹。白鴿黨事後都不知幾㷫，話佢哋連盟友都玩埋，於是佢哋去搵喺立法會大樓外示威嘅群眾攞威，白鴿黨都費事睬佢哋。咁就足以證明，泛民內部鬼打鬼啦！