小白觀點：隨時要求吞併澳門

國家領導人送兩隻熊貓畀澳門當作生日禮物，從此大熊貓唔再係香港海洋公園嘅獨市生意。澳門旅遊當局轉數一向夠晒快，一個小島都可以包裝成為國際級賭城，依家仲多兩隻熊貓添，真係唔得掂呀。話唔定遲啲澳門會有隻荷官大熊貓，一邊叼住口煙，一邊大嗌「買定離手」，賭客輸錢畀國寶都心甘命抵啦，到時想唔賺到笑都難。

讀者大人睇到呢度可能會問，乜今日嘅題目唔係「煲呔曾面皮超厚」咩？係呀，我想講嘅係，到時煲呔曾一定酸溜溜，攤大手板攞着數，要熊貓、CEPA都冇乜意思，以佢成丈厚嘅面皮，夠膽死喊住lur地要阿爺送會生金蛋嘅澳門畀香港o架！

網友觀點...X）...

[　Donald T　]

不如問煲呔曾有幾多個假面皮啦，天天新款，厚到拉住笑唔到！

[　無厘頭　]

厚過獅子山，haaaaaaa！

[　Kelvin　]

今年都算多政治show，煲呔曾面皮應該增厚咗幾吋，如果唔係點可以抵得住出嚟笑吓講兩句廢話就走人呀。

[　明太子　]

好心煲呔曾就化好啲個妝啦，成日出嚟黑面唔好睇㗎！

網址：www.sunsiupak.blogspot.com

阿豪觀點：畀人掟嘢都冇咁傷

煲呔曾雖然民望低，但就勝在有阿Q精神，佢日前喺電視專訪中居然大大聲咁話：「我做咗四年特首，依家仲有咁嘅支持率，已經好好同好幸運喇！」嘩，面皮會唔會厚咗啲呢？今次豪伯要破例撐煲呔曾，佢雖然面皮厚如城牆，但係仍然可以好官我自為之，未使腳痛落台，仲唔係「好好同好幸運」？當然啦，如果煲呔曾喺「我做咗四年特首」呢句後面，再講埋「雖然貧窮人口不斷增加，失業率居高不下……（下刪三千字）」，咁意思就更加完整嘞。

再講吖，對於唔受歡迎嘅政客嚟講，面皮厚絕對係好事，就算好似意大利總理貝魯斯干尼咁畀人兜口兜面掟中，都冇咁傷吖嘛！

網友觀點...X）...

[　窮爸爸富媽媽　]

佢對自己要求咁低都冇計啦……

[　momgetwell　]

唓，佢唔係視民望如浮雲咩，有咩所謂~

[　匿名　]

畀人揶揄民望低，應該謙虛啲話會做好啲盡量改善，佢就覺得已經好好，真係「孺子可教」呀！

[　死佬學人走佬　]

其實都幾慘，畀阿爺指住嚟鬧，都仲要笑口噬噬扮冇嘢。

網址：www.lukchiho.blogspot.com