真係一百歲唔死都有新聞！今後超市如果失竊或遇上高買，筆者奉勸超市負責人切勿報警，道理一字咁淺，條數亦好易計，高買損失有限，偷竊亦有個譜，若然差人查案，分分鐘全間超市嘅食物都唔見晒！

紀律部隊又調整薪酬，何須寒酸到連人家店裏的乾糧都唔放過？筆者以前只知警隊最愛向財務公司舉債，近來又知道佢哋愛借用水警輪出海到蒲台島食海鮮，逍遙快活。但睇怕唔係個個咁好景，一哥要好好徹查並慰勞吓至得。

警隊負面新聞接二連三，最令人髮指嘅係強姦報案少女。日前，兩個關注性工作者團體「紫藤」及「午夜藍」發起遊行，批評繼續有警員於掃黃時濫權，包括「食霸王餐」享免費性服。當今天下，警察眼中為何件件嘢都係Free of Charge？

堂堂男子漢何以淪落至此？那是警察學堂教導無方，出來佗槍時又監管不力。康熙有庭訓，指安逸舒適打造不出勁旅，所謂「教之以勞，有勇知禮」。今之差人執勤時好逸惡勞，不知何謂「公僕」，又怎會對市民知禮？

警察跟市民同樣是人，他們的先天跟市民並沒有對峙的基因，只是在後天上，權力的掌握容易導致腐敗和濫用。「警察世家」出身的曾蔭權好應該諗一諗點樣撥亂反正！我們不願見到警察的質素衰過「捉葛柏反貪污」時，不要忘記你們吃誰的飯！