嗱嗱，本報尋日報道，本港老年黃斑病變患者超過十六萬人，處理得唔好隨時會失明，但係有效醫治黃斑病變嘅藥居然被列入自費藥物名冊，搞到每年有五百個病人面臨冇錢醫病、隨時變盲。為咗慳錢，醫管局據講計劃引入一種用嚟治療腸癌嘅新藥，充當治療黃斑病變嘅藥物，廉價提供畀病人。

本來呢，改用較平價嘅新藥，問題都唔大，最弊呢種藥係用嚟治療大腸癌，至於用嚟治療黃斑病變咯喎，完全未經大型臨床研究證實，亦未獲外國相關機構認可。呢，葡萄牙曾經有三名黃斑病變患者因為用咗腸癌藥物治療而失明，加拿大甚至明文禁止用呢種藥治療黃斑病變添。

講到呢度，大家係咪有啲毛骨悚然呢？而更恐怖嘅係，連藥廠都反對醫管局嘅做法。香港視網膜協會認為，醫管局嘅做法唔理智、唔道德，等於將啲冇錢病人當白老鼠，罔顧病人健康及安全。有眼科醫生批評，醫管局淨係畀醫生免費開一種風險未明嘅藥，令病人變咗試驗品。有藥劑師指出，醫學界一向唔鼓勵適應症外使用，批評醫管局出賣病人健康。

醫生反對、藥劑師反對、藥廠有生意都唔想做，好明顯，醫管局以癌症藥醫黃斑病變嘅做法好有問題！講到底，醫管局一意孤行，無非係錢字作怪，係涼薄兼無良。

叮！自從醫管局推出藥物名冊，每年唔知有幾多病人冇錢冇得醫，醫管局唔撥亂反正，反而諗縮數，以次充好，將錢睇得比病人嘅生命更加重要，簡直豈有此理！不過，最滑稽嘅係，原來就算轉用比較平嘅藥，醫管局都未必可以慳到錢。事關藥廠講到明反對局方用新藥治療黃斑病變，所以就算病人同意使用，萬一出咗乜事，醫管局都要承擔責任，隨時得不償失添。

唉，醫管局嘥大筆公帑請啲高層返嚟，淨係行政總裁蘇利民嘅年薪都成幾百萬，但係佢哋只識得諗埋藥物名冊呢啲屎橋出嚟。蘇利民啊蘇利民，不如炒晒你哋班高層，慳番啲錢畀病人買藥，咁咪一天都光晒咯，叮！