小白觀點：特區「首陀羅」等死

鬍鬚曾早前心臟病發入廠，成棚醫生圍住，莫講話做「通波仔」吖，財爺畀個櫃佢一樣照通，但如果一般百姓咯喎，會有乜待遇呢？前排有個小市民同財爺同病相憐，醫生叫佢等十個月，結果出院冇幾耐就拜拜。

唉，香港係咪趕英超美就唔知，但可以肯定嘅就係拍得住印度，學晒人哋嗰套種姓制度，由頭到腳分為婆羅門、剎帝利、吠舍、首陀羅四個階層。煲呔曾當然係尊貴嘅婆羅門啦，至於普羅打工仔，唔使講就係首陀羅賤民啦。若然大家有睇過《一百萬零一夜》，都知道賤民有幾慘，弊在香港連《百萬富翁》呢個節目都冇埋，各位特區首陀羅，想翻身作主呀？等下世啦！

網友觀點......

下等人

同人唔同命吖嘛，唔恨得咁多㗎啦，擺明大細超！

小李飛

真係慘，唔理乜病都要等九年，輕重不分，政府咁樣對待小市民，無錢就無命！

Fiona Chan

畀你排到期又點吖，醫院隨時大贈送紗布、鉗、手術刀，睇吓你裝唔裝得落。

熊太郎

鬼叫你窮呀，搵命送！政府醫院都分貴賤，真係要罷交稅，不養有錢人。

網址：www.sunsiupak.blogspot.com

阿豪觀點：「醫者父母心」咪會錯意

乜嘢叫做親疏有別？除咗睇煲呔曾之外，都可以睇吓公立醫院點做嘢。

有個病人心臟病發入院，醫生明明都話係嚴重，但係唔知點解住院一星期就畀人叫出院，連通波仔手術都冇做。卒之呢個病人出院後心臟病復發，仲不幸過埋身添。老實講，如果病發嗰位係高官，你打死我都唔信醫院會咁懶懶閒！咁樣都仲唔係親疏有別係咩呀？

雖然開講都有話，「醫者父母心」，但係大家千祈唔好會錯意，以為係「父母愛子之心無微不至」嗰一種「父母」，而係講緊「父要子死，子不得不死」裏面嘅中國傳統倫理思想。只要諗住入醫院出唔番嚟係盡孝道，咁心理就自然平衡番晒啦！

網友觀點......

匿名

唉……真係戥嗰位病人傷心。

abc

政府做嘢真係一致！！

bobochan222

心臟病咁大件事，點解會咁兒戲，隨便叫人出院？依家搞出人命，睇佢點賠番畀人！

sophia_mok

交咁多稅換嚟呢啲醫療服務？真係寧願移民澳門好過！

網址：www.lukchiho.blogspot.com