臨近年尾，政圈零舍多喜事，早前先有立法會議員涂謹申結婚及梁劉柔芬娶新抱，前晚又輪到申訴專員黎年娶新抱，佢個仔黎競同新娘子喺中環四季酒店大排筵席，到場嘅賓客包括好多高官，其中兩位係黎年嘅港大同學，即公務員事務局局長俞宗怡（D姐）同食物及衞生局常秘李淑儀（Sandra），而宿友就有中策集團主席馬時亨。
D姐、Sandra與黎年同為七四年港大歷史系畢業生，至於早黎年一屆畢業嘅肥亨，就做過黎年嘅港大宿友，肥亨○二年出任財經事務及庫務局局長時，黎年亦做過佢下屬，擔任該局（庫務）常任秘書長，兩人經常孖公仔出入。有份遴選黎年做申訴專員嘅前憲制事務司施祖祥及行政會議成員張建東都去捧場。
其他高官包括媽打李麗娟、公務員敍用委員會主席吳榮奎夫婦、曾任保安局局長嘅議員葉劉淑儀，立法會都有經濟動力林健鋒（Jeffrey）、梁君彥及專業會議石禮謙（大舊石）去捧場，做完心臟「通波仔」手術無耐嘅大舊石話，手術好順利，依家行得、食得、瞓得，多謝大家關心。