美國總統奧巴馬當選以來，一言一行都備受全球注視，佢同父異母嘅細佬馬克尋日都喺香港舉行活動，但人氣卻差得多。馬克寫咗新書，尋日喺香港舉行旋風式簽名會，先後穿梭跑馬地、中環及尖沙咀等多間書店，不過，呢本書似乎睇嘅人多，但幫襯買書嘅只有幾個，其中一個熟口熟面嘅粉絲，仲係在東莞開廠嘅全國政協委員梁偉浩。
馬克今次嚟香港要宣傳嘅新書全名叫做《NAIROBI TO Shenzhen》，除咗講述佢喺非洲、美國同埋深圳嘅所見所聞，書中都提及馬克童年畀爸爸打留下嘅童年陰影故事，內容早前曾經引起外界討論，有人甚至認為佢用哥哥過橋作宣傳。不過，馬克推銷本書時好有禮貌，同每一個買咗書嘅讀者傾談幾分鐘。
佢尋日並無接受傳媒訪問，又透過工作人員話希望低調啲，搞到大家埋唔到身咁滯。