澳門回歸十周年，煲呔曾率領一眾官員過去出席活動，點知一上岸就亂噏嘢，話「我哋香港同澳門只係隔住一條河」。咁都得？牛頭角順嫂都知去澳門叫過大海啦，冇理由煲呔曾連呢啲常識都唔知嘅，或者五年前老董都係去澳門出席回歸慶祝活動，畀中央領導人要求查找不足，之後好快就腳痛落台，搞到近期醜事連篇嘅煲呔曾好驚青，以致心神恍惚，河同海都分唔清啩。
其實，每年年底都係煲呔曾上京述職嘅時候，今年佢施政報告劣評如潮，又爆出慳電膽同弟婦提早獲賠兩單醜聞風波，張成績表肯定被人打交叉，只係佢驚到河、海不分，黑白顛倒，政府新聞處都要奉旨補鑊，出稿時自動謄正為「一海之隔」，費事佢繼續出醜。
煲呔曾噏錯嘢係經常事，早前接受一個電視節目訪問時，佢又係亂噏一通。譬如自嘲早前入場睇東亞運足球時好興奮，仲話自己「失禁」，佢講到興起，更連中央領導人同德蘭修女都攞嚟講笑，話唔覺得自己每次見領導人時攞紙筆抄筆記冇面，仲話領導人一樣有用簿仔寫低，「只係唔喺鏡頭前寫之嘛」。
跟住佢又話自己隨身有德蘭修女張相，煲呔曾竟然話，長毛衝過來時，佢會試吓用張相對住佢，睇吓靈唔靈喎。
將德蘭修女嘅相當成「驅毛符」，真係大不敬。