聖誕來臨，「公職王」鄭慕智年年都喺機場約埋老友記報佳音，等海內外旅客一抵達香港就感覺到窩心同溫馨，今年嘅鐵腳一樣有機管局行政總裁許漢忠，喺自己地頭搞呢類咁有意義活動，佢梗係唔少得。許漢忠話，今年機場航班多咗，大圍生意應該都好啲，不過，佢謙稱自己唔係專家，仲話個人投資都坐緊艇。
許漢忠話，自己喺航空業做咗三十幾年，投資都好似佢打工咁，最緊要長線，不過最緊要係有實力，因為上上落落一定有，大家可以學吓o架。呢個聖誕佢都會抽空同屋企人飛去東京梳乎吓。
前立法會會計界代表李家祥（Eric）亦係報佳音嘅鐵腳之一，佢就話今年唔會出埠，太太補充話，今年多朋友嫁娶，淨係呢個月都唔止十單，加上讀緊會計嘅囡囡月尾要考試，佢哋兩公婆唔想掉低個女一個喺屋企刨書咁慘，所以寧願留喺香港幫個女打氣，女承父業，佢哋梗係不離不棄啦。