銀行大班叻管錢，但唔叻使錢，出年二月開始出任滙豐中國董事長及台灣區主席嘅鄭海泉就係一個人辦，尋日由獅子銀行贊助嘅「學生營商體驗計劃」展銷會開鑼，鄭大班一如以往，同埋太太一齊落場撐學生，上次買買吓冇錢，要太太救駕兼即刻搵櫃員機㩒錢，今年又點呢，佢大把錢使，但係人民幣囉……
鄭大班尋日準備充足咁同太太去行學生擺嘅檔，睇啱貨品時，佢攞錢畀人，點知佢嗰張係「人仔」，鄭大班自己都唔知出事，要係人哋提醒佢攞住嗰張綠色人仔唔係港幣五十蚊，佢先發現自己攞錯錢。佢遲啲要以北京為家，身上常袋人民幣一啲都唔出奇，何況佢早前豪擲一百九十萬元人民幣買人債，最後批得九十六萬，或者係咁，依家身邊人仔多得滯啩。
講番呢個「學生營商體驗計劃」展銷會，除咗鄭海泉外，仲有即將接任做亞太區行政總裁嘅王冬勝、同教育局副局長陳維安主持開幕。陳維安花咗百幾兩百蚊買懷舊玩具，好似六十八蚊嘅豆袋就係佢嘅心頭好，佢仲同其中一檔嘅學生玩拍公仔紙，佢話細個有玩過拋豆袋，但公仔紙就唔識拍，所以趁機學吓玩。