信興集團主席蒙民偉係城中活躍分子，周不時見佢約老友食飯或者出席公開場合，甚至搞吓音樂演奏會，最近卻一反常態，早前「蒙仔」蒙德揚喺港大扑頭攞名譽大學院士銜咁威水嘅事，唔見蒙叔到場；上個月佢哋公司喺沙田搞一年一度嘅樂聲盃，蒙叔一樣甩底缺席，坊間仲傳出蒙叔身體唔多好嘅消息，甚至要入醫院。不過，「蒙仔」尋日話，爸爸只係感冒啫，已經好番晒。
感冒好小事啫，點解會搞到絕迹江湖咁耐呢﹖尋日入馬場嘅蒙仔話，佢爹哋之前只係有少少感冒，但佢將中西藥撈埋一齊食，結果搞到嚴重咗，所以咪要休養吓囉，依家冇事啦，身體好番晒，咩事都無，仲識得鬧人添。
蒙仔又話，嚟緊聖誕節佢哋全家都唔會外遊，所有兄弟姊妹仲會喺世界各地返嚟陪蒙叔玩！