本文重點
廣深港高速鐵路香港段嘅六百七十億元撥款表決案，前晚喺立法會畀社民連同公民黨嘅拉布戰術搞到難產，被迫押後到出年一月八號再玩過，呢個結果一出，運輸及房屋局局長鄭汝樺（Eva）臉色一沉，財委會主席劉慧卿都好無奈，聽聞特首辦同政府高層更震晒，事關泛民綁劫高鐵議題成功，元旦政治局勢又添新變動，更何況高鐵嘅如意算盤夢碎，最驚係司法覆核搞到高鐵變領匯翻版，到時高鐵真係唔知幾時至起得好。
早喺推銷工程時，Eva便強調希望今個年底前啟動工程，依家雖然延後咗二十日，年曆上已經跳咗一年，最弊係該局本嚟打算撥款案一過，就陸續安排招標、預審甚至前期工序嘅工程開工，等啲公司抓緊聖誕、新年長假期做準備，盡快擬定標書等，免得遲啲又撞正農曆新年長假期。
聖誕新年忙斡旋
可惜家吓押後到下個月八號，運房局原有計劃落空晒，日前畀拉布戰術玩殘嘅Eva仲要喺聖誕、新年期間忙拉票、箍票、斡旋反對勢力。事關反高鐵陣營今次贏咗一仗後，出位、激進嘅抗議手法勢必喺元旦遊行再搶風頭，下個月八號嘅財委會會議可以話係暗湧處處。
特區政府內部受到嘅打擊都唔細，聽聞佢哋最擔心嘅係日前社民連嘅長毛梁國雄抬出司法覆核立法會審議程序嘅招數，有關方面都要急急評估上法庭嘅機會率，唔希望高鐵撥款成為領匯事件嘅翻版。
連場好戲仲有另一個受害人，即係財委會主席、白鴿黨嘅劉慧卿，佢喺早兩日嘅會議已經畀公、社兩黨以程序問題玩到謝，下下都要搵法律顧問解畫，延期到下個月八號，又唔知啲議員會用乜招嚟對付佢呢個主席，難怪有白鴿黨人都話卿姐都係呢件事嘅受害人啦！