豬流感殺人無數，市民談病毒色變，依家幾咁艱難先買咗疫苗返嚟，點解會冇人吼㗎？事關早排有消息話豬流感針副作用好大，打咗有可能癱瘓，仲話台灣有孕婦打針後胎死腹中。香港市民聽咗都好驚，老實講，邊個想攞條命仔較飛噃。

衞生署見到疫苗冇人吼，就呼籲家長盡快帶細路嚟打針。佢哋話，豬流感患者有六分之一係幼童，感染風險極高，而豬流感第二波有可能提早出現，但疫苗要注射兩個禮拜後先會有保護作用。聽佢哋咁講，好似唔即刻打針就會死人咁。正如有傳染病科醫生話齋，政府為咗谷數，於是打茅波嚇家長。

話時話，如果真係好似佢哋講得咁危急，就更加要叮爆政府個鎯鎯，年初豬流感爆發嘅時候，食衞局局長周一嶽就話要購買疫苗為市民注射，但淨係大隻講，拖咗大半年先買到，如果延誤咗接種時機，要追究責任嘅話，周一嶽點講都甩唔到身。叮！

其實，疫苗嘅副作用又唔係真係咁嚴重嘅，如果當局將真實情形講清楚，班家長都會放心畀細路注射。弊就弊在班高官胡言亂語，令人愈聽愈心驚。嗱，佢哋啱啱先話豬流感針風險同季節性流感差唔多，叫大家唔使驚，話口未完，又制訂等同生死狀嘅同意書。如果風險唔係好大，又使乜簽生死狀咁大陣仗？

高官見嚇窒咗市民，就話簽同意書絕對唔係簽生死狀，只係想知道打針嘅人屬邊一類高危人士啫。周一嶽仲話，唔簽同意書都可以注射疫苗。高官一時講一樣，令人無所適從。咁搞法，莫講話普通市民，連醫護人員都話唔會打豬流感針。有醫生直情話，等周一嶽打咗先，我就會打嘞。

講得一啲都冇錯，要令家長放心，靠呃靠嚇係冇用嘅。嗱，人哋台灣當局就識做嘞，行政院長吳敦義睇見民眾有顧慮，就親自去醫院，捋起衫袖打咗一針。喂，院長打咗都冇事，民眾仲怕乜嘢呀？於是乎，大家拿拿臨去醫院，幾日就有五十萬人打咗針。

反觀香港，到時三百萬支疫苗買咗返嚟拍烏蠅，嘥咗幾億公帑事小，一旦第二波豬流感殺到，市民有乜冬瓜豆腐，咁又搵邊個賠命？係咪周一嶽呀？