喺三年前賣咗亞洲商業銀行後，收咗幾十億Cash嘅陳有慶家族，喺香港都冇乜令人眼前一亮嘅投資，但最近陳家靜極思動，打算豪擲十幾億元搶地起醫院，即刻成為城中話題。
其實，陳家喺泰國等地已有醫院，尋日喺慶祝亞洲保險成立五十周年酒會上，陳智思亦證實會研究競投黃竹坑塊地，目標係起一間針對本地人嘅私家醫院，服務本港市民。佢形容香港已經好耐冇開放投資私家醫院，今次機會好難得，但係最終都要睇地價合唔合理，如果塊地好似市價咁貴，倒不如起樓去賣好過。
至於會唔會同其他投資者夾份競投，佢即刻耍手擰頭，因為佢哋同泰國嘅康民醫院合作得好愉快，唔需要再引入其他投資者。佢又提到喺蘇州嘅地產項目賣得好好，第一期已經賣咗九成，賣晒嘅話可以有五億元人民幣收入，到時公司手頭更加鬆動啦！