搵方剛黃國健捱義氣

建制派之前揼晒心口都只係搵到建仔劉江華、經濟動力梁劉柔芬、專業會議梁美芬同「五散人」嘅林大輝四個捱義氣加入，仲爭三個先夠數。

喺無計可施下，有人就諗到用「強迫交數」嘅手法，規定每個建制派政團都要派一名代表參加，迫使之前堅拒參與嘅工聯會同富貴黨「交人」。其中富貴黨已用「抽生死籌」嘅方式，抽中副主席方剛入會，工聯會就仲苦惱緊由邊個去啃咗呢舊豬頭骨，極可能係黃國健。

剩低嗰席照計應喺餘下嗰七名獨立建制派內揀選，但葉劉淑儀係譴責動議嘅和議人之一，依例唔准加入；李鳳英同黃宜弘就身兼立法會另外兩個調查委員會嘅正副主席，理應可獲豁免；謝偉俊同詹培忠早就講明唔認同調查，死都唔加入；最後得番體育界霍震霆同金融界李國寶，兩個都係出名嘅立會大懶蟲，叫佢哋入會隨時搞到流會，名副其實係揀無可揀。