外號「民主阿婆」嘅前政務司司長陳方安生，早前聯同壹傳媒集團主席黎智英、白鴿黨創黨主席李柱銘同前港區人大代表李鵬飛，喺淫賤黎大宅搞咗個「密室飯局」強推五區總辭，但班白鴿仔最後都係以超過八成票數向呢個「四人幫」說不，打散佢哋嘅總辭大夢！
民主阿婆當晚即時發表聲明狠批白鴿黨，尋日佢再乘機再狂踩白鴿黨為自己遮醜，又向昨晚開會確認總辭計劃嘅公文袋施壓，以防佢哋臨場轉軚縮沙。
陳太昨日同記者一方面話各泛民黨派應該立即停止互相攻擊，以免令內訌加劇影響選民喺將來五區補選嘅投票意欲，但另一方面佢又點名批評白鴿黨對自己嘅認受性同市民冇信心，質疑該黨嘅決定係「未戰先降」，再一次有口話人冇口話自己！
民主阿婆仲表明會參加喺元旦日舉行嘅反政改方案遊行，並會考慮取消原定喺復活節假期起行嘅美加英三國「唱衰香港」之旅，留港瞓身為辭咗職嘅泛民議員助選。問佢會唔會幫成日公開鬧佢嘅社民連候選人站台拉票，佢就聲言會「對事不對人」喎。但有社民連中人就表明冇咁嘅需要，費事佢哋啲支持者見到呢位「忽然民主」嘅「陳老太」，會忍唔住爆粗鬧佢同請佢食蕉！