飯局喺傍晚七點正開始，大宅主人楊孫西同詹培忠冒住大雨寒風出門迎客，原來係中聯辦副主任黎桂康囉。其實中聯辦主任彭清華同兩位隨行嘅中聯辦部長早已抵埗咗。

接近十點半飯局先結束，事後絕大部分與會者都封口拒談飯局詳情，但我哋八到，飯局一如所料有傾政改同總辭，雖然並冇具體嘅建制派補選名單、競選部署同抗衡泛民嘅策略，但亦有好坦誠咁分析局勢同交流意見，爭在未有即場齊齊高舉五隻手指、誓言要全取五區補選踢走泛民。

彭清華論盡政改普選總辭

餐飯嘅重頭戲就係彭清華喺食完甜品之後發表嘅重點指導性講話嘞！講話主要分為政改、普選同總辭三個部分，大意係無論泛民最終搞唔搞得成總辭，政改諮詢都會如期進行、如期表決；並且重申人大常委會已就普選問題講得清清楚楚，二○一七同二○二○年雙普選嘅嚴肅承諾，唔會因為總辭進行與否同有乜結果而出現改變；又強調泛民鍾意搞總辭就由得佢搞，唔影響中央對港政策。

呢番講話無疑係為一眾準備參加補選嘅建制派壯膽，鼓勵佢哋全力應戰！