非執董亦與高鐵有衝突

雖然秘書處提交嘅文件冇指名道姓，但估都估到係衝住專業會議兩名議員何鍾泰同「大舊石」石禮謙而嚟。早前喺工務小組討論高鐵撥款申請前，做主席嘅何鍾泰同委員大舊石畀網民同反高鐵組織踢爆涉嫌有利益衝突，前者被質疑身為中國建築獨立非執行董事，後者身兼港鐵同新創建集團董事，結果何鍾泰連主席都唔做，要避席兼唔投票，而大舊石就身在醫院做通波仔手術而缺席會議。

工務小組當日通過咗呢項申請，但唔代表爭拗會結束，預計喺後日嘅財委會又會拗多次。可能因為咁，為免到時拗到流會，連票都投唔到，倒不如早啲解決嘞！

對於有委員質疑非執董職位係咪應該被視為須予披露嘅金錢利益一事，秘書處提交嘅文件話，喺法律上執董同非執董並冇分別，雖然冇直接嘅利益，但都屬於間接利益，秘書處仲參考過外國議會嘅例子，認為就算係間接利益都應該早啲披露。

相信都好明白咯呵，何鍾泰同大舊石係非執董，雖然冇直接嘅利益，但都有間接利益應該早啲申報，而唔係之前喺相關事務委員會傾嘅時候吞晒落肚，等到最後畀人踢爆先講，暗批佢哋申報得太遲。

份文件冇話要追究任何議員，但聽聞截止尋日，秘書處收到二百一十七份投訴喺高鐵撥款事宜上，有議員涉嫌存在利益衝突，而議員個人利益監察委員會主席「蘇菲」梁劉柔芬都收到六十五份相類似嘅投訴，睇怕何鍾泰同大舊石仲有好多手尾跟。