小白觀點：遲早K粉開奶餵B

K毒問題嚴重，話說有個o靚妹喺九歲開始就索K，一直索到十三歲，卒之索到膀胱兼夾腎功能嚴重受損，要排期洗腎，唉！成世人流流長，都唔知點算。不過大家少替佢擔心啦，小白老弟敢寫包單，呢個o靚妹腎當然要洗，K當然不能不索，反正啲器官壞得七七八八咯，唔死都冇用，索得更加冇後顧之憂啦。

事實上，索K係代表咗一種共同語言，如果呢種嘢可以賣廣告嘅話，唔使諗，一定用「今日索咗未？」所以當局做埋啲乜嘢校園驗毒大龍鳳，根本就冇對症下藥，鬼唔知索K年輕化咩，甚至有嬰兒化趨勢添啦，小弟立此存照，遲早有十三歲o靚妹K粉開奶餵BB都未定。

網友觀點......

肥婆

九歲就索K，早成咁，真係生舊叉燒好過。

Sandy

十三歲就洗腎，佢以後嘅人生點過吖，難為咗佢嘅父母。唉！

Ming哥

政府點搞o架，又話禁毒，連細路仔都買到毒品，索到個個都腎衰竭！

喜瑪拉亞K

新一代個個索到腎虧，將來人人都孭住洗腎機過世，香港又一美譽索K腎虧港。

網址：www.sunsiupak.blogspot.com

阿豪觀點：唔索反被叫「毒男」

唔少青少年鍾意索K就大家都知，但原來呢股歪風嘅嚴重程度已經超乎大家想像。有家庭醫生話見過有九歲童開始索，索到十三歲終於要洗腎，好得人驚喎。大家有冇好計幫吓呢班後生仔女呀？九歲索K，令豪伯諗起依家啲o靚仔o靚妹，愈嚟愈早開始學人搞嘢，好似話十四歲女仔都驚畀人話係「老處女」喎。吖，唔知未索過K嘅人，有冇咩特別嘅稱呼嘅呢？網上啲人話未索過K嘅男仔肯定係「毒男」（真係唔明，點解網上叫冇異性緣嘅男仔係「毒男」呢？明明K仔先至係毒品喎）。

為咗證明自己都有異性緣，豪伯被迫耐唔耐就要去一次廁所，仲畀人笑腎虧，你都咪話唔慘！

網友觀點......

吳索K

九歲開始索？真係聞所未聞，太誇張了。

傻仔

好有興趣知嗰個九歲妹妹當初係因為乜嘢而索第一次K，失戀呀？

港隊好波

相信推行校園驗毒，唔多唔少會打擊學生吸毒嘅，最好係小學都推行埋。

beatles友

當年九歲嘅我閒時會睇卡通片、跳橡筋繩，點解依家會變成閒時索K！依家個社會出咗咩問題？

網址：www.lukchiho.blogspot.com

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另作通知，敬請留意。

明日主題

網上賣初夜