又難怪居民有咁大反應嘅，呢棵係全香港最大嘅木棉樹，成二十三米高，樹身直徑有一米半咁粗，幾個人手拉手都抱唔埋，樹冠覆蓋範圍就有三十米咁闊，每年紅棉盛放時，都唔知幾壯觀，幾艷麗。

當局話喎，呢棵木棉樹嘅根部懷疑畀真菌侵蝕，經過幾個月搶救無效，先決定放棄。本來呢，樹同人一樣，都會生老病死，棵樹有病救唔番，惟有斬咗佢，係無可厚非嘅。之不過咁，有環保組織踢爆，呢棵木棉樹王兩年前仲係好健康，乜事都冇，點解咁快就有「病」，而且仲「搶救無效」呢？

環保組織嘅質疑唔係冇道理，事關港府對樹木嘅管理可以話係一塌糊塗。話就話有多個政府部門有份管樹，但其實係「三個和尚冇水食」，全港七十幾萬棵樹，包括幾百棵古樹長期無王管，自生自滅，周時發生冧樹傷人事故。

最恐怖嘅係舊年嗰單赤柱冧樹殺人事件，一棵百歲刺桐樹忽然之間塌下，一名港大女學生慘死樹下。事後發現樹心已經畀蟲蛀到爛晒，而康文署仲話一個禮拜前啱啱檢查過，認為棵樹嘅健康狀況可以接受喎，點知話口未完就出事。樹木管理制度有幾混亂，由此可見一斑！

不妨再舉多個畸士，深水埗英華街有幾十棵白蘭樹，當中唔少已歪歪斜斜、甩皮甩骨，當局用鐵架將樹箍住，唔畀佢仆低。不過箍完就闊佬懶理，好嘞，棵樹慢慢長大，鐵架就愈箍愈緊，卒之搞到樹身傷痕纍纍。鐵架本來係用嚟保護樹木嘅，但係落到康文署手上，就變成傷害樹木嘅兇器，你話幾戇居吖。叮！

政府不嬲都係唔死人唔做嘢，赤柱發生冧樹事件後，當局急急補鑊，委派政務司司長唐英年出任「管樹大隊長」，研究樹木管理政策。結論係，依家管理樹木嘅部門太多，各自為政，所以要成立一個部門統籌咁話，講嚟講去，都係要先打納稅人嘅荷包。

話時話，唐唐做咗咁耐管樹大隊長，究竟有乜嘢貢獻呀？佢哋護理樹木懶懶閒，斬樹就不知幾勤力，直情係「有殺錯、冇放過」，短短幾個月殺咗幾千棵樹，好多古樹名木都死得不明不白。唐唐仲話喎，以後每年要「移除」約八千棵樹。叮，叫你管樹咋，唔係叫你斬樹吖！

咁搞法，仲使乜成立「樹木辦」吖，不如成立斬樹辦算啦，年年斬、日日斬，將全香港嘅樹都斬清光，咪唔會再冧樹死人囉！