金秋之後，香港例牌興起食蟹熱，近排好多大閘蟹宴，唔少城中人一嘗美味時，都好擔心身體受唔到，食物及衞生局常任秘書長李淑儀（Sandra）就好節制，嚴守均衡飲食之道，食親大閘蟹都只係淺嘗一隻咁多，或者，佢主責衞生範疇，對健康之道別有心得啩。
Sandra尋日出席兒童癌病基金暫顧及復康中心開幕禮，唔講唔知，佢今年已經五十有七，但身形苗條、活力充沛，唔通有獨門秘方﹖佢話，無論幾忙都好，每朝早必定準時六點鐘起身走去做gym，每次做足三十分鐘。運動之外，仲講究飲食，均衡之道必須嚴守。此外，Sandra每年仲會定期驗身，防患於未然，咁真係萬無一失噃﹗
