英文報章《南華早報》又寫錯嘢，搞出張冠李戴笑話。專業會議梁美芬尋日向《南早》發警告信，指《南早》尋日一篇報道，錯誤報道佢係民建聯成員，報道完全錯誤同失實，對此佢深表遺憾同不滿，要求《南早》澄清。梁美芬去年入立法會，唔揀民建聯而加入專業會議，就係要凸出專業人士形象，但畀《南早》寫一寫，隨時前功盡廢，陰功！
梁美芬尋日發新聞稿，對《南早》尋日寫佢同紅磡海濱用地被剔出勾地表嘅報道，提出四點反駁，批評《南早》「報道欠缺事實根據」、「明顯在未經查證的情況下隨意發表評論」、「欠缺傳媒應有的專業操守」等，字裏行間，怒氣難消，尤其對《南早》寫錯佢係民建聯成員好火滾，話如果錯誤屬故意，則《南早》係極不負責，對佢極不公道，故意中傷佢喺地區嘅工作咁話。
其實《南早》報道出錯鬧出笑話，已經唔係第一次。○三年「上海首富」周正毅太太毛玉萍因為涉嫌貪污同串謀詐騙被廉署拘留，傳媒競相報道，《南早》竟然刊登咗名媛榮文蔚嘅相片，誤當佢係毛玉萍，令榮文蔚大表不滿，《南早》最後要刊登道歉啟事，唔知《南早》今次又點收科？