東亞運開幕，醫管局都忙埋一份，因為醫管局有六十五名醫生同六十五名護士用私人時間做義工，自發到各個比賽場地駐守，為運動員提供即時緊急服務。醫管局主席胡定旭尋日一早就走訪咗多個比賽場地，為醫生護士打吓氣，佢仲承諾東亞運落幕之後，會自己掏荷包請班手足食餐勁，慰勞佢哋咁辛苦。
肥胡腳頭都幾好，尋日第一站去醉酒灣，就見證咗本港BMX好手王史提芬攞東亞運香港第一金，之後佢去紅館，當時正值進行日本對澳門嘅排球賽，但肥胡又可以見證落後嘅澳門最後反勝日本。睇完排球佢就過番海去大球場睇七人欖球賽，唔使講梗係又係港隊贏啦！
