一個銀行大班嘅成長，原來經歷好多不為人知嘅訓練。銀行界「梁朝偉」王冬勝日前接受周梁淑怡訪問，大講陳年舊事，仲透露應付擠提嘅方法。王冬勝話，佢曾經做過冇槍冇警衞傍身嘅解款員，不過，呢個解款員認真烏龍，運錢時竟然爆出錢袋穿窿嘅笑話，好彩冇搞到銀紙滿街飛。
佢話，八十年代佢所屬嘅銀行被傳擠提，散戶急急嚟排隊攞錢，搞到佢要做解款員，仲要一運就係三千萬，點知運運吓個錢袋穿咗，好彩當時喺車入面，但都有唔少路過嘅人眼望望，尚幸有驚無險！不過，有鈔票唔代表可以解決擠提，公關了得嘅佢靈機一觸，即晚安排記者入銀行庫房，等大家見到佢哋銀紙充足，第二日又安排喺街度排隊嘅客戶去有冷氣歎嘅室內地方排隊，條街再冇出現嚇人嘅提款人龍，擠提就此煙消雲散。
佢當年離開渣打被傳係不滿舊公司裁員，實情係點呢？王冬勝話，當時跳槽滙豐並非單單因為裁員，而係因見到新公司內地發展嘅資源投放得好，佢嘅答案兩方面都唔得罪，果然公關了得。